Naiara de la Puente Finlandiaren eta bere jaioterriaren, Gasteiz, artean bizi da, Akordeoiaren Pedagogiako unibertsitate-karrera egin eta Erasmusetik Helsinkiko Sibelius Akademiara joateko aukera sortu zitzaionetik. Luis Aramburu Udal Musika Eskolan lehenengoz sartu zenean entzun zituen, gaur egun bere etxea eta lantokia den Akademia horren erreferentziak. Txikitan eskuraezin imajinatu zuen zerbait, orain bere errealitatea da; hain zuze ere, bere partiturak ikasten hasi zen irakasle hark lagundu dio bere doktore-tesiaren azterketa artistikoan. Modu naturalean bizi izan duen ibilbide pertsonal eta profesional honek zaletasun bat izaten hasi zena bizimodu bihurtu du.
Naiarak bere akordeoian, estudioan eta entsegu-orduetan lasaitasuna, bake mentala eta bere instrumentuarekin bera egotearen poza aurkitzen ditu. Dedikazio, esfortzu eta gozamenezko orduak, entzuleekin eta beste musikari eta ganberakideekin partekatu nahi dituenak. Ganbera formatu honek aukera ematen du musika partekatzeko, beste tinbre eta instrumentu batzuk entzuteko, eta sozializatzeko, jakina. Alderdi horri garrantzi berezia ematen dio; izan ere, beste instrumentu batzuetan egiten zuten bezala, txikitan beste haur batzuekin elkartzeko aukera ez zuen izan. Bere doktorego-tesian ganbera-musikaren garrantzia eta talde heterogeneoek, ez akordeoien artean bakarrik, instrumentua bera garatzeko dituzten onurak aztertzen ditu.
Gasteiztarra bihotzez, bere apustua Gasteizera itzultzea da, bete-betean eta eroso sentitzen den tokra. Akordeoiari buruz duen ulertzeko modua, ezagutza eta beste herrialde batzuetan kontzertu-akordeoiari ematen dioten balioa ekartzeko aukera profesionala izatea gustatuko litzaioke, eta, bide batez, funtsezkoa deritzon instrumentuarekin hasten diren gazteei transmititzea.
Gaur egun, bere doktoregoaz gain, diziplina anitzeko proiektuetan murgilduta dago. Esaterako, Siberiako herri indigena batean oinarritutako musikarekin eta grabazioekin Finlandiako musikagile batekin egin duen bezala. Horien bidez, Siberiako Chupotkaren tradizio kultural hori txalapartaren perkusioaren soinuarekin eta, ondorioz, euskal herriaren tradizioarekin lotzeko modua aztertu dute.
Gasteizen, Ivan Casado txelo-jotzailearekin batera, akordeoi-txeo bikotea osatzen du. Bertan, errepertorio klasikoaz eta transkripzioez gain, musika garaikidea interpretatzen dute eta konpositoreekin ere lan egiten dute errepertorio berriak sortzeko. Eta Akartia Triorekin batera, ahotsak, saxofoiak eta akordeoiak osatutako hirukotea, Hegoafrikako Musika Garaikidearen Munduko Biltzarrera (ISCM) gonbidatu dituzte.
Argazkia: Borja Trivi