“Nire lana kulturari balio soziala ematea eta gizartera hurbiltzea da”. Horrela definitzen du Leyre Martinez gasteiztarrak bere lana kultur bitartekari gisa, Artearen Historia ikasi ondoren deskubritu zuen lanbidea. “Konturatu nintzen ezagutza guztiek ez zutela zentzurik gero inguruan dudan errealitatera hurbiltzen ez baziren. Orduan hasi nintzen interesatzen arte-hezkuntzaz eta hezkuntza-berrikuntzako metodologiez. Nire kezka berak zituzten pertsona gehiago zeudela ulertu nuen eta nire interesetara egokitzen zen lanbide bat zegoela ikusi nuen”, dio.
Orduan, museo eta erakunde kulturaletan hezkuntza eta bitartekaritzan espezializatutako ikastaro, tailer eta mintegien bidez hasi zen bere burua prestatzen. Metodologia artistikoei buruzko hainbat ikastaro ere egin zituen, Art Thinking, esaterako. “Gainera, uste dut garrantzitsua dela landa-lana eta zure esperientzia pertsonala”, baieztatzen du.
Kultura-bitartekari gisa lan egin du Gasteizko ibilbide historiko-artistikoetan eta Santa Maria katedralean. Gaur egun, ‘Espazio Artemisa’ lanean dihardu, Portugaleteko aisialdiko arte-hezkuntza integralean eta bertako gazte-artearen babesean aritzen diren artista eta kultura-kudeatzaileen elkartean. “Bitartekaritza lana beharrezkoa da arteari ahotsa emateko; ahots horiek isiltzen baditugu, historiaren zati bat gabe geratzen gara, eta esanahia eta balioa galtzen da”.